Aleanca për Shqiptarët, krahu i udhëhequr nga Ziadin Sela, ka zhvilluar një takim me diasporën shqiptare në Cyrih, ku u raportua për një pritje të ngrohtë dhe mbështetje të gjerë nga bashkëatdhetarët.

Në këtë aktivitet, të organizuar nga Lëvizja Shqiptare, Sela dhe deputetja Ilire Dauti u mirëpritën nga qindra pjesëmarrës, ndërsa diskutimet u përqendruan në çështje kombëtare dhe rolin e diasporës në zhvillimet politike.

Të pranishmit shprehën shqetësim për situatën politike në Maqedonia e Veriut dhe theksuan rëndësinë e përfshirjes më aktive të mërgatës në vendimmarrje. Nga ana e tij, Sela deklaroi se angazhimi i diasporës duhet të rritet, duke përmendur si prioritet mundësimin e votimit nga jashtë, përmes formave elektronike ose me postë.

Në fund të takimit u theksua se bashkëpunimi mes subjektit politik dhe organizatave në diasporë do të vazhdojë, me synimin për të forcuar lidhjet me mërgatën dhe për të avancuar kauzat kombëtare.