Tre anije transporti me flamur të Kinës kanë kaluar pa pengesa në Kanali i Hormuzit, duke shënuar lëvizjen e parë pas një muaji bllokimi në Gjiri Persik dhe duke rritur spekulimet për një rol më aktiv të Pekinit në zgjidhjen e krizës.

Ministria e Jashtme kineze deklaroi se vlerëson “ndihmën e ofruar nga palët e interesuara”, pa dhënë detaje, ndërsa kalimi i anijeve pranë ishujve iranianë Larak dhe Qeshm konsiderohet një zhvillim me peshë politike, pavarësisht se sipas kompanisë COSCO ato nuk transportonin ngarkesë.

Situata mbetet e tensionuar pas zhvillimeve të fundit që lidhen me politikat e Donald Trump ndaj Iranit, ndërsa Pekini vijon të mbajë një qëndrim të kujdesshëm. “Hormuzi është një rrugë e rëndësishme tregtare për mallra dhe energji. Kina kërkon një armëpushim të shpejtë dhe stabilitet në Gjirin Persik”, deklaroi zëdhënësja e diplomacisë kineze.

Ndërkohë, nga takimi mes ministrit të Jashtëm Wang Yi dhe homologut pakistanez Ishaq Dar në Pekin, u prezantua një dokument pesëpikësh që kërkon ndalimin e armiqësive, nisjen e negociatave për paqe dhe garantimin e lirisë së lundrimit.

Pavarësisht përfshirjes së kujdesshme, Kina ka interesa të mëdha ekonomike në rajon, duke importuar një pjesë të konsiderueshme të energjisë nga Lindja e Mesme, çka e shtyn të mbështesë stabilitetin dhe rihapjen e plotë të këtij korridori strategjik.