Papa Leoni XIV ka reaguar ndaj kritikave të ashpra të Donald Trump, duke theksuar se qëndrimet e tij për paqen burojnë nga mesazhi i Ungjillit dhe nuk lidhen me sulme politike.

Ai deklaroi se “ta vendosësh mesazhin tim në të njëjtin nivel me atë që presidenti është përpjekur të bëjë këtu, nuk tregon kuptim të mesazhit të Ungjillit”, duke shtuar se, pavarësisht komenteve, do të vazhdojë misionin e tij për paqe dhe pajtim.

Papa theksoi se thirrjet e tij nuk janë drejtuar personalisht ndaj Trumpit, por synojnë të paralajmërojnë për rreziqet e konfliktit dhe atë që ai e quajti “iluzion i gjithëfuqisë” në luftëra si ato që përfshijnë Shtetet e Bashkuara të Amerikës, Izrael dhe Iran.

Më herët, Trump e kishte kritikuar publikisht Papën, duke thënë se “nuk po e bën mirë punën e tij” dhe se është “shumë liberal”, ndërsa publikoi edhe një imazh simbolik të krijuar me inteligjencë artificiale.

Deklaratat vijnë në një moment të tensionuar ndërkombëtar, ndërsa Papa, gjatë vizitës në Algjeri, theksoi se “Zoti nuk i dëgjon lutjet e atyre që bëjnë luftë”, duke përsëritur thirrjen për paqe globale.