Çmimet globale të naftës kanë shënuar rënie të fortë pas njoftimit se Ngushtica e Hormuzit është rihapur plotësisht për trafikun tregtar, duke lehtësuar qarkullimin e anijeve gjatë periudhës së armëpushimit.

Nafta e papërpunuar Brent ka zbritur në rreth 88 dollarë për fuçi, nga mbi 98 dollarë që ishte regjistruar më herët gjatë ditës, duke reflektuar menjëherë ndryshimet në tregjet ndërkombëtare të energjisë.

Ministri i Jashtëm i Iranit, Abbas Araghchi, deklaroi se “kalimi për të gjitha anijet tregtare është garantuar”, duke konfirmuar hapjen e plotë të korridorit strategjik detar.

Në reagim të menjëhershëm, tregjet financiare globale shënuan rritje, ku indeksi S&P 500 u rrit me 0.8%, ndërsa Nasdaq dhe Dow Jones me mbi 1%, ndërsa edhe bursat evropiane regjistruan trend pozitiv.

Ngushtica e Hormuzit mbetet një nga pikat më strategjike të transportit global të energjisë, përmes së cilës kalon rreth një e pesta e furnizimit botëror me naftë dhe gaz natyror të lëngshëm.