Njëri nga liderët e VLEN, Izet Mexhiti, ka deklaruar se ky koalicion ka vendosur standarde të reja në skenën politike shqiptare, duke theksuar se ndryshimi erdhi përmes bashkëpunimit dhe jo veprimeve individuale.

Në një intervistë për emisionin “Samo intervju” në Kanal 5, ai u shpreh se, “dëshmuam dhe sollëm ndryshime në bllokun politik shqiptar pas 20 vitesh, jo individualisht, por si ekip”, duke shtuar se bashkimi i opozitës ishte hapi i parë drejt këtij transformimi.

Mexhiti theksoi se koordinimi brenda koalicionit është i vazhdueshëm dhe i fokusuar në realizimin e programit të premtuar, ndërsa nënvizoi se VLEN nuk ka frikë nga zgjedhjet e parakohshme parlamentare.

Sipas tij, “nëse do të kishte zgjedhje të parakohshme, kjo do të nënkuptonte fundin e Bashkimi Demokratik për Integrim”, ndërsa shtoi se aktualisht nuk ka nevojë për një proces të tillë, pasi shumica parlamentare është stabile dhe ndër më të mëdhatë në historinë e Kuvendit.