Të dhënat e fundit nga analizat rajonale për Investimet e Huaja Direkte tregojnë një rënie të thellë të investimeve në Maqedoninë e Veriut gjatë vitit 2025. Sipas këtyre analizave, investimet kanë pësuar një ulje prej 61% krahasuar me vitin 2024, duke arritur në vetëm 468 milionë euro, një nga nivelet më të ulëta në rajon.

Ekspertët theksojnë se ky trend reflekton mungesën e kushteve bazë që kërkon kapitali i huaj, si siguria juridike, stabiliteti politik dhe funksionimi efikas i institucioneve. Në një klimë të tillë pasigurie, investitorët po orientohen drejt vendeve të tjera më të qëndrueshme.

Rënia e investimeve pritet të ketë ndikim të drejtpërdrejtë në ekonomi, duke reflektuar më pak vende pune, ulje të prodhimit dhe kufizim të mundësive për të rinjtë. Ndërkohë, zhvillimet politike të brendshme dhe marrëdhëniet me partnerët ndërkombëtarë konsiderohen si faktorë që kanë ndikuar në këtë situatë.

Kritikat ndaj qeverisë janë shtuar, pasi premtimet për rritje ekonomike dhe investime nuk janë realizuar, ndërsa vendi po humb pozicion në konkurrencën rajonale për kapital të huaj.