Ministri i Punëve të Jashtme dhe Diasporës i Kosovës, Glauk Konjufca, ka marrë pjesë në edicionin e radhës të Antalya Diplomacy Forum, ku u zhvillua takimi i ministrave të jashtëm të vendeve të Ballkanit Perëndimor.

Takimi, i organizuar nga ministri i Jashtëm i Turqisë, Hakan Fidan, mblodhi përfaqësues të lartë diplomatikë të rajonit për të diskutuar sfidat aktuale dhe zhvillimet gjeopolitike.

Gjatë diskutimeve u theksua rëndësia e forcimit të bashkëpunimit rajonal dhe koordinimit mes vendeve të Ballkanit Perëndimor, në një kohë kur zhvillimet globale kërkojnë qasje të përbashkët dhe angazhim më të madh diplomatik.

Sipas Konjufcës, në takim u ritheksua edhe përkushtimi i Turqisë për të mbështetur vendet e rajonit dhe për të qenë një partner aktiv në proceset e bashkëpunimit dhe stabilitetit.

Forumi në Antalia vijon të konsiderohet si një platformë kyçe për dialog diplomatik dhe për afrimin e qëndrimeve mes vendeve të rajonit dhe partnerëve ndërkombëtarë.