Ministri i Punëve të Jashtme dhe Tregtisë së Jashtme të Maqedonisë së Veriut, Timço Mucunski, ka marrë pjesë në takimin e tretë ministror të Platformës Ballkanike për Paqe, i cili u zhvillua në Antalia, në margjinat e Forumit Diplomatik të Antalias.

Takimi u zhvillua me pjesëmarrjen e ministrave të jashtëm nga vendet e Ballkanit Perëndimor dhe Turqia, ku u diskutuan zhvillimet globale dhe dinamika rajonale. Në fokus të bisedimeve ishin proceset e integrimit në Bashkimin Evropian, menaxhimi i fatkeqësive natyrore, forcimi i lidhshmërisë rajonale, si dhe politikat për të rinjtë dhe arsimin.

Gjatë fjalës së tij, Mucunski rikonfirmoi mbështetjen e vendit të tij për nismat që synojnë stabilitet dhe bashkëpunim rajonal. Ai vlerësoi veçanërisht projektet që lidhen me inovacionin, arsimin dhe përfshirjen e të rinjve, duke përmendur edhe idenë për organizimin e një festivali rajonal teknologjik.

Ministri theksoi gjithashtu rëndësinë e reformave dhe përafrimit me standardet evropiane, si dhe nevojën për zhvillim në fusha kyçe si infrastruktura, shëndetësia dhe digjitalizimi i arsimit.

Platforma Ballkanike për Paqe, e iniciuar në vitin 2025 nga ministri turk Hakan Fidan, synon forcimin e stabilitetit dhe bashkëpunimit rajonal përmes dialogut dhe projekteve të përbashkëta. Deri më tani, janë mbajtur tre takime ministrore në kuadër të kësaj platforme.