Një incident i rëndë sigurie u shënua gjatë White House Correspondents' Dinner në Washington Hilton, ku një person i armatosur tentoi të sulmonte pjesëmarrësit.

Sipas Associated Press, i dyshuari është identifikuar si Cole Tomas Allen, 31 vjeç, nga Torrance. Ai raportohet të jetë inxhinier mekanik me diplomë nga California Institute of Technology dhe dyshohet se kishte në shënjestër “anëtarë të administratës Trump”.

Pamjet e publikuara tregojnë momentin kur një person kalon kontrollin e sigurisë dhe më pas ndërhyjnë forcat e rendit. Donald Trump deklaroi se “ai është një person i sëmurë” dhe shtoi se i dyshuari “kishte armë të shumta”.

Kryetarja e bashkisë së Washington, Muriel Bowser, tha se “nuk kemi arsye të besojmë se persona të tjerë janë të përfshirë”, duke theksuar se deri tani duket se ai ka vepruar i vetëm.

Ndërkohë, prokurorja federale Jeanine Pirro konfirmoi se ndaj tij janë ngritur akuza për vepra penale që lidhen me armë zjarri dhe sulm.

Gjatë ndërhyrjes, një oficer policie u godit, por shpëtoi falë jelekut antiplumb. “Ai u godit nga afër me një armë shumë të fuqishme dhe jeleku bëri punën e tij”, deklaroi Trump.