Ish-shefja e grupit parlamentar të Lëvizjes Vetëvendosje, Arbërie Nagavci, ka reaguar pas dështimit të zgjedhjes së Presidentit në Kosova, duke akuzuar partitë opozitare për bllokim të procesit dhe bashkërendim veprimesh me Lista Serbe.

Përmes një reagimi publik, Nagavci theksoi se çdo propozim i Lëvizja Vetëvendosje është refuzuar nga opozita, duke shtuar se “secili propozim i yni hasi në refuzim, përpjekja për të shmangur zgjedhjet e parakohshme u përball me një bllokadë të pakapërcyeshme, në vend të angazhimit konstruktiv pamë vetëm mungesë vullneti për zgjidhje”.

Ajo shtoi se, sipas saj, qëndrimet e partive opozitare si PDK, LDK dhe AAK kanë qenë të njëjta me ato të Listës Serbe, duke refuzuar pjesëmarrjen në votim dhe kandidaturat e propozuara, përfshirë edhe figura që i cilësoi si konsensuale.

Pas dështimit të Kuvendit për të zgjedhur kreun e shtetit brenda afatit kushtetues, vendi pritet të shkojë në zgjedhje të reja parlamentare brenda 45 ditëve.