Industrialisti rus Alexey Mordashov vijon të mbetet një figurë me ndikim në industrinë globale, jo përmes prodhimit të drejtpërdrejtë të automjeteve, por përmes kontrollit të zinxhirit të furnizimit me çelik.

Pas sekuestrimit të jahtit të tij “Lady M” në vitin 2022 dhe raportimeve për lëvizjen e anijes “Nord”, emri i tij rikthehet në vëmendje, këtë herë për rolin e ndërtuar ndër vite në industrinë automobilistike. Përmes kompanisë Severstal, Mordashov krijoi një bazë të fuqishme furnizimi për prodhuesit e makinave në Evropë dhe më gjerë.

Në fillim të viteve 2000, ai hyri edhe në prodhim përmes Severstal-auto, duke bashkëpunuar me marka ndërkombëtare si Fiat dhe SsangYong. Kompania më vonë u transformua në Sollers, duke vijuar partneritete me gjigantë si Ford Motor Company dhe Mazda.

Megjithatë, ndikimi kryesor i Mordashov mbeti në furnizimin me çelik për industrinë, ku Severstal ishte një nga partnerët kyç për prodhues të mëdhenj ndërkombëtarë, përfshirë Renault dhe Hyundai-Kia.

Pas vendosjes së sanksioneve nga Bashkimi Evropian, Shtetet e Bashkuara të Amerikës dhe Mbretëria e Bashkuar, aktiviteti i kompanisë në tregjet perëndimore u kufizua ndjeshëm, duke çuar në tërheqjen e disa partnerëve strategjikë nga tregu rus.

Megjithëse nuk njihet për koleksione luksoze makinash, Mordashov mbetet një nga figurat kyçe që ka ndikuar indirekt në industrinë globale të automobilave, duke kontrolluar për vite me radhë burimin kryesor të prodhimit, çelikun.