Komisioni Qendror i Zgjedhjeve ka certifikuar 4 prej 5 subjekteve të reja politike që aplikuan për pjesëmarrje në zgjedhjet e parakohshme për Kuvendin e Kosovës, të cilat do të mbahen më 6 qershor 2026. Ndër subjektet e certifikuara janë tre koalicione dhe një kandidat i pavarur. Koalicioni i parë është Lëvizja VETËVENDOSJE!, i përbërë nga katër parti: Lëvizja VETËVENDOSJE!, Guxo, Alternatia dhe Partia Shqiptare Demokristiane. Koalicioni i dytë është Koalicija Vakat, i formuar nga Demokratska Stranka Bosnjacka dhe Demokratska Stranka Vatan, ndërsa i treti është ASHKALITË E BASHKUAR, i përbërë nga Partia e Ashkailinjëve për Integrim, Partia Demokratike e Ashkalinjëve të Kosovës dhe Lëvizja për Bashkëveprim. Kandidati i pavarur i certifikuar është Esmir Kasi.

KQZ refuzoi certifikimin e dy subjekteve të tjera për shkak të mosplotësimit të kritereve ligjore. Për nismën qytetare Složno Pobeđujemo dhe partinë SDA – Stranka Demokratske Akcije, thuhet se ligji kërkon "listën e mbështetësve me së paku 1,000 nënshkrime," të cilën këto dy subjekte nuk arritën ta dorëzojnë.

Në total, për zgjedhjet e qershorit do të garojnë 3 koalicione, 17 parti politike dhe 1 kandidat i pavarur. Gjithashtu, KQZ vendosi rritjen e kapacitetit të votimit në konsullatën e Kosovës në Frankfurt, duke e çuar numrin maksimal të votuesve nga 1,500 në 1,900, pasi "misioni diplomatik posedon kushte të mjaftueshme hapsinore dhe logjistike për të administruar deri në 1,900 votues."Burimi: Klan Kosova