Ambasadori i Shqipërisë në Maqedoninë e Veriut, Denion Meidani, ka përcjellë një mesazh paqeje dhe solidariteti me rastin e festës së Kurban Bajramit, duke uruar të gjithë besimtarët myslimanë. Në urimin e tij, ambasadori theksoi se kjo festë "na rikujton vlerën e heshtur të besimit, sakrificës dhe paqes me vetveten", duke e cilësuar atë si një moment të rëndësishëm reflektimi dhe afrimi mes njerëzve.

Meidani shprehu dëshirën që Kurban Bajrami të jetë burim frymëzimi për të gjithë, duke thënë: "Uroj që kjo ditë të sjellë më shumë dritë në shpirt, më shumë mirësi mes njerëzve dhe më shumë arsye për të besuar tek njëri-tjetri." Mesazhi i ambasadorit vjen si shprehje e vlerave të përbashkëta të bashkëjetesës dhe mirëkuptimit ndërnjerëzor.