Zëvendëskryeministri përgjegjës për Qeverisjen e Mirë, Arben Fetai, ka njoftuar se i ka dorëzuar kryeministrit Hristijan Mickoski dorëheqjen e tij nga detyra që ushtronte në Qeverinë e Maqedonisë së Veriut.

Përmes një njoftimi publik, Fetai e cilësoi largimin e tij si një vendim të mirëmenduar dhe të marrë me bindjen se në rrethanat aktuale është veprimi më i drejtë dhe më dinjitoz. Ai theksoi se gjatë dy viteve të mandatit ka punuar për avancimin e reformave që synojnë rritjen e llogaridhënies, transparencës dhe forcimin e shtetit të së drejtës.

“Largohem me kokën lart dhe me ndërgjegje të pastër. Ky është një vendim i mirëmenduar, i marrë me bindjen se në rrethanat aktuale kjo është gjëja më e drejtë dhe më dinjitoze”, ka deklaruar Fetai.

Ai pranoi se jo të gjitha objektivat janë realizuar në masën e dëshiruar, por nënvizoi se ka punuar me përkushtim maksimal për të vendosur baza të qëndrueshme për vazhdimin e reformave në të ardhmen.

Në mesazhin e tij, Fetai falënderoi ekipin bashkëpunëtor, partnerët ndërkombëtarë, organizatat e shoqërisë civile dhe qytetarët për mbështetjen e dhënë gjatë ushtrimit të detyrës, duke shtuar se angazhimi në shërbim të interesit publik do të vazhdojë edhe jashtë funksioneve institucionale.