Grupi i transportit autotaksi të Qytetit të Shkupit njoftoi se prej nëntë vitesh çështjet e pazgjidhura po rrezikojnë punën e transportuesve dhe sigurinë e pasagjerëve. Taksistët theksojnë praninë e transportuesve të paligjshëm, shoferëve të paparaqitur dhe parregullsive me taksimetrat, duke kërkuar ndërhyrje urgjente institucionale. Revoltën e tyre e ka shtuar refuzimi për lëshimin e licencave për automjete më të vjetra se viti 2011, masë që sipas tyre mund të lërë qindra shoferë pa punë. Nga Qeveria kërkojnë ndryshime ligjore dhe forcim të kontrolleve inspektuese. Nëse gjendja në sektor nuk përmirësohet, taksistët paralajmërojnë protestë në ditët në vijim.