Njoftimi i kryeministrit Hristijan Mickoski për ndërtimin e Qendrës së re Klinike pranë Qendrës Sportive "Boris Trajkovski" ka ndezur një përplasje të ashpër mes VMRO-DPMNE-së dhe LSDM-së. Renata Mladenovska nga LSDM deklaroi se "lokacioni që po paralajmërohet është plotësisht i papërshtatshëm për ndërtimin e një objekti kaq të madh dhe kompleks shëndetësor", duke shtuar se "shtrohet pyetja serioze se sipas cilit ligj, në çfarë procedure dhe mbi bazën e cilës vendim, Qeveria po negocion drejtpërdrejt me pronarë privatë për dhënien e tokës." Nga VMRO-DPMNE u përgjigjën me kundërakuza, duke theksuar se "me LSDM-në dhe Filipçen, qytetarët nuk morën Qendër të re Klinike, nuk morën shëndetësi më të mirë dhe as kushte më të mira për trajtim", ndërsa shtuan se lokacioni pranë "Boris Trajkovski", së bashku me "8 Shtatorin" dhe Poliklinikën "Bukuresht", do të formonin "një kompleks të plotë" me qasje në gaz dhe afër unazës. Kryeministri Mickoski ka theksuar se nëse gjithçka shkon si duhet, ndërtimi mund të fillojë vitin e ardhshëm, megjithëse lokacioni mbetet pronë private dhe negociatat me pronarin janë ende në vazhdim.

Burimi: 21 Televizion