Kryetari i LSDM-së, Venko Filipçe, ka vlerësuar se deklaratat e presidentes Gordana Siljanovska-Davkova përbëjnë një konfirmim të qëndrimeve që LSDM i ka mbrojtur prej kohësh lidhur me procesin e integrimit evropian dhe raportet me Bullgarinë.

Përmes një postimi në rrjetin social “X”, Filipçe deklaroi se për herë të parë nga VMRO-DPMNE po artikulohet publikisht një qëndrim që, sipas tij, LSDM dhe Fronti Qytetar për të Vërtetën dhe Drejtësinë e kanë theksuar vazhdimisht. “Mosmarrëveshjet historike me Bullgarinë dhe puna e Komisionit Historik nuk janë pjesë e kushteve për vazhdimin e negociatave me Bashkimin Evropian. Kjo është një çështje bilaterale midis Maqedonisë dhe Bullgarisë, jo një kusht evropian”, deklaroi Filipçe.

Ai theksoi se çështjet historike duhet të trajtohen në kuadër të dialogut dypalësh, duke nënvizuar se ato nuk duhet të paraqiten si pengesë në rrugën e vendit drejt anëtarësimit në Bashkimin Evropian.