Kryetari i BDI-së, Ali Ahmeti, mori pjesë në pritjen solemne të organizuar nga Ambasada e Republikës së Sllovenisë në Republikën e Maqedonisë së Veriut, me rastin e Ditës Kombëtare të Sllovenisë dhe Ditës së Forcave të Armatosura të këtij shteti. Ahmeti bëri të ditur se pjesëmarrja në këtë ngjarje erdhi me ftesë të ambasadorit Gregor Presker, ndërsa theksoi se ceremonia shërbeu për riafirmimin e miqësisë dhe bashkëpunimit të shkëlqyer mes dy vendeve, si dhe për vlerësimin e kontributit të Sllovenisë në mbështetjen e proceseve demokratike, integrimit evropian dhe stabilitetit rajonal. Me këtë rast, kreu i BDI-së uroi popullin dhe institucionet e Republikës së Sllovenisë, duke u dëshiruar përparim, mirëqenie dhe suksese të mëtejshme.