Kryetari i Aleancës për Ardhmërinë e Kosovës, Ramush Haradinaj, ka deklaruar se do ta shqyrtonte mundësinë për të kandiduar për President të Kosovës në rast se do të propozohej nga partitë opozitare. Duke folur para gazetarëve, Haradinaj u shpreh se vendi po kalon një periudhë sfiduese, ndaj nuk do ta përjashtonte një kandidim të mundshëm. "Nëse opozita do të më propozonte, do ta shqyrtoja mundësinë e kandidaturës. Kosova është në sfida të mëdha, në vështirësi të mëdha. Do ta shqyrtoja nëse do të kandidoj apo jo", deklaroi ai. Haradinaj theksoi se deri më tani nuk ka qenë kandidat për postin e Presidentit dhe se as aktualisht nuk e konsideron veten kandidat. "Ju e dini, unë s'kam qenë kandidat për President, nuk jam edhe sot", tha ai.