Një nga figurat më me ndikim në udhëheqjen kineze po konsiderohet gjithnjë e më shumë Cai Qi, bashkëpunëtori më i afërt i presidentit Xi Jinping, i cili sipas analistëve shihet si njeriu i dytë më i fuqishëm në politikën e Kinës dhe si figura që po përgatit terrenin për një mandat të katërt të Xi në krye të Partisë Komuniste në vitin 2027. Edhe pse renditet i pesti në Komitetin e Përhershëm të Byrosë Politike, Cai Qi ka marrë në drejtim disa nga strukturat më të rëndësishme të partisë, përfshirë Zyrën e Përgjithshme, Sekretariatin Qendror, Gardën Qendrore dhe së fundmi edhe Shkollën Qendrore të Partisë, ku përgatiten kuadrot e ardhshëm të udhëheqjes. Sipas analistëve, emërimi i tij në këtë post synon të forcojë mbështetjen ideologjike për rizgjedhjen e Xi Jinping. Leksioni i parë i Cai Qi u përqendrua te “Mendimi i Xi Jinping për ndërtimin e Partisë”, duke sinjalizuar një fushatë të re për rritjen e besnikërisë ndaj liderit kinez. Marrëdhënia mes Xi Jinping dhe Cai Qi daton prej më shumë se dy dekadash, ndërsa besimi i ndërsjellë ka bërë që ai të ngjitet në nivelet më të larta të pushtetit. Sipas ish-analistit të CIA-s, Jonathan Czin, në rast se Xi Jinping do të largohej papritur nga pushteti pa caktuar një pasardhës, kandidati më i mundshëm për ta zëvendësuar do të ishte pikërisht Cai Qi.