Kryetari i BDI-së, Ali Ahmeti, ka përkujtuar sot ngjarjet e 9 korrikut 1997 në Gostivar, duke i cilësuar ato si një nga kapitujt më të dhimbshëm të historisë së afërt të shqiptarëve në Maqedoninë e Veriut. Ai theksoi se atë ditë shqiptarët u përballën me "dhunë brutale shtetërore, maltretime, arrestime, humbje jetësh dhe burgosje", vetëm pse kërkonin respektimin e identitetit, dinjitetit dhe të drejtave të tyre legjitime. Ahmeti u shpreh se gjenerator i krizës ishte edhe vendimmarrja e Gjykatës Kushtetuese, e cila, sipas tij, "në vend që të ishte mbrojtëse e rendit kushtetues, e të drejtave dhe e bashkëjetesës, u shndërrua në burim tensionesh dhe të një krize me pasoja të rënda". Ai shtoi se ngjarjet e asaj kohe dëshmojnë pasojat që sjell humbja e paanshmërisë së institucioneve dhe politizimi i drejtësisë. Sipas Ahmetit, ngjarjet e 9 korrikut 1997 duhet të mbeten një mësim i përhershëm, duke theksuar se "historia nuk guxon të përsëritet" dhe se institucionet duhet të jenë garantuese të Kushtetutës, barazisë dhe paqes, e jo burim krizash dhe tensionesh ndëretnike. Në fund, ai nderoi të gjithë ata që humbën jetën, u maltretuan, u burgosën dhe u sakrifikuan në mbrojtje të dinjitetit dhe të drejtave të shqiptarëve, duke theksuar se kujtesa për Gostivarin e vitit 1997 mbetet obligim që ngjarje të tilla të mos përsëriten më.