Një ngjarje e rëndë ka ndodhur në Klos, ku 38-vjeçari Erkin Lika dyshohet se ka humbur jetën pasi ra nga Ura e Vashës gjatë një stërvitjeje me litar në lumin Mat. Ai ishte pjesë e Shërbimit të Kërkim-Shpëtimit Malor të Shqipërisë dhe po zhvillonte ushtrime në momentin e aksidentit. Ekipet e kërkim-shpëtimit po vijojnë operacionin për gjetjen e trupit të tij në ujërat e lumit Mat dhe në zonën përreth Urës së Vashës. Erkin Lika, banues në Tiranë, ishte specialist i rrjeteve të fibrave optike dhe speleolog i certifikuar, i trajnuar nga organizata italiane Club Alpino Italiano dhe Società Speleologica Italiana. Ai ishte gjithashtu një nga themeluesit e Shoqatës Speleologjike Shqiptare, duke dhënë një kontribut të rëndësishëm në zhvillimin e speleologjisë në vend.