Ministrja në detyrë e Drejtësisë, Donika Gërvalla, ka bërë të ditur se ka dorëzuar kallëzim penal ndaj ministres serbe Snezana Paunoviq, pas deklaratave të saj lidhur me spastrimin etnik të Kosovës. Sipas Gërvallës, deklaratat e bëra në një intervistë për një media serbe përbëjnë gjuhë urrejtjeje dhe nxitje të përçarjes. Ajo njoftoi se i ka kërkuar Zyrës së Kryeprokurorit të Shtetit të ndërmarrë veprimet e nevojshme hetimore dhe ta procedojë rastin pranë organeve kompetente. “Republika e Kosovës nuk hesht dhe asnjëherë nuk përkulet para gjuhës së urrejtjes, thirrjes e nxitjes për përçarje dhe mosdurimit. Nuk ka hapësirë për glorifikimin e spastrimit etnik, relativizimin e gjenocidit e krimeve monstruoze serbe dhe përhapjen e narrativave që synojnë cenimin e paqes, sigurisë dhe bashkëjetesës ndëretnike, si dhe nxitjen e urrejtjes”, ka deklaruar Gërvalla. Ajo theksoi gjithashtu se deklaratat që justifikojnë dëbimin e një populli nuk mund të konsiderohen retorikë politike, pasi, sipas saj, ato mbartin pasoja të rënda historike dhe juridike.