Kryeministri në detyrë i Kosovës, Albin Kurti, priti në takim ambasadorin jo-rezident të Irlandës për Kosovën, Ragnar Almqvist, duke vlerësuar marrëdhëniet e mira ndërmjet dy vendeve dhe mbështetjen e vazhdueshme që Irlanda i jep Kosovës. Kurti theksoi se Irlanda është një shtet mik dhe partner i rëndësishëm për Kosovën, duke shprehur mirënjohje për kontributin e saj në kuadër të KFOR-it dhe EULEX-it. Ai nënvizoi gjithashtu rëndësinë e Presidencës irlandeze të Këshillit të Bashkimit Evropian. Në takim, Kurti deklaroi se Kosova është "demokracia më e avancuar në rajon", me "mesataren më të lartë të rritjes ekonomike" dhe me mbështetje të lartë qytetare për integrimin evropian. Sipas tij, vendi është plotësisht i harmonizuar me politikën e jashtme dhe të sigurisë së Bashkimit Evropian, ndërsa shtoi se "statusi kandidat dhe hapja e negociatave për anëtarësim në Bashkimin Evropian janë njohje e meritës për reformat dhe progresin që Kosova ka dëshmuar".