Ministria e Infrastrukturës dhe Transportit ka njoftuar se më 18 dhe 19 korrik 2026 do të ketë mbyllje të përkohshme të qarkullimit në segmentin rrugor Brezovicë–Prevallë (R115), për shkak të zhvillimit të Garës Automobilistike Malore “Brezovica 2026”, të organizuar nga Federata e Auto Sporteve të Kosovës. Qarkullimi do të ndërpritet në të dyja ditët nga ora 10:30 deri në orën 18:00. Sipas njoftimit, më 18 korrik do të zhvillohen stërvitjet zyrtare, ndërsa më 19 korrik gara zyrtare. Ministria bëri të ditur se për mbarëvajtjen e aktivitetit dhe sigurinë e pjesëmarrësve, organizatorët do të bashkëpunojnë me Policinë e Kosovës dhe institucionet përgjegjëse. Njëkohësisht, qytetarëve u është bërë thirrje që të planifikojnë lëvizjet e tyre gjatë këtyre intervaleve, të respektojnë sinjalizimin e përkohshëm rrugor dhe udhëzimet e Policisë së Kosovës dhe zyrtarëve të angazhuar në terren.