Kryeministri Edi Rama, gjatë një vizite në Qendrën Sociale “Jonathan”, prezantoi masat e reja të qeverisë për mbështetjen e personave me aftësi të kufizuara dhe familjarëve të tyre. Ai bëri të ditur se ndihma ekonomike për fëmijët dhe të rinjtë me nevoja të veçanta është dyfishuar, ndërsa nga kjo masë do të përfitojnë rreth 11 mijë fëmijë dhe të rinj. “Është një punë e përditshme, një përkushtim i përditshëm me të gjitha vështirësitë, por edhe me shumë dashuri dhe shpresë. Zgjodhëm këtë vend për të folur më gjerë për këto qendra dhe ndërmarrje sociale, por edhe për të prekur atë që para pak javësh qeveria realizoi, dyfishimin e mbështetjes ekonomike për fëmijët me nevoja të veçanta. Jam shumë i lumtur që sot mbështetja për ta është dyfishuar. Janë 11 mijë fëmijë dhe të rinj që do të përfitojnë nga kjo masë”, u shpreh Rama. Kryeministri njoftoi gjithashtu se buxheti i shtetit do të mbulojë plotësisht sigurimet shoqërore dhe shëndetësore për të gjitha nënat dhe kujdestarët që kujdesen për fëmijët me aftësi të kufizuara, si pjesë e paketës së re të mbështetjes sociale.