Kadetët e Forcës së Sigurisë së Kosovës përfaqësuan Republikën e Kosovës në aktivitetin ndërkombëtar “International Cultural Evening”, të organizuar në Akademinë Mbretërore Ushtarake Sandhurst në Mbretërinë e Bashkuar. Gjatë këtij aktiviteti, kadetët prezantuan para pjesëmarrësve nga vende të ndryshme të botës kulturën dhe identitetin e Kosovës, përmes gastronomisë tradicionale, veshjeve kombëtare, promovimit të potencialit turistik, si dhe historisë e trashëgimisë kulturore të vendit. Në mbështetje të aktivitetit morën pjesë edhe Atasheu i Mbrojtjes i Republikës së Kosovës në Mbretërinë e Bashkuar, nënkolonel Ilir Beqiri, dhe zëvendëskonsulli Ilir Bytyqi. Ambasada e Kosovës në Londër vlerësoi se pjesëmarrja në një institucion prestigjioz si Sandhurst dëshmon profesionalizmin e FSK-së dhe përkushtimin e Kosovës për forcimin e partneritetit me Mbretërinë e Bashkuar dhe avancimin e orientimit euroatlantik.