Albulena Haxhiu pritet të jetë sërish propozimi i Lëvizjes Vetëvendosje për kryetare të Kuvendit të Kosovës. Këtë e ka bërë të ditur zëvendëskryeministri i parë në detyrë, Glauk Konjufca, i cili tha se çështja pritet të formalizohet në mbledhjen e ardhshme të Kryesisë së partisë. “Unë mendoj që kryetaren e Kuvendit tashmë e kemi vendosur, ajo është zonja Haxhiu. Dhe ma merr mendja që do jetë propozimi i njëjtë”, deklaroi Konjufca. Ai gjithashtu tha se nuk e sheh veten si kandidat për president dhe shprehu optimizëm për zhvillimin e bisedimeve me Lidhjen Demokratike të Kosovës, në kuadër të përpjekjeve për konstituimin e institucioneve. Sipas Konjufcës, pas zgjedhjeve të dhjetorit kishte pasur një bllokadë të plotë dhe, sipas tij, synimi kishte qenë që vendi të rikthehej në zgjedhje. Ai theksoi se tani duhet parë se si do të zhvillohet situata brenda LDK-së, duke nënvizuar se kjo parti ka autonominë e plotë për vendimmarrjen e saj. Ndërkohë, bisedimet mes LDK-së dhe Vetëvendosjes mbeten të pezulluara, në një kohë kur brenda LDK-së është kërkuar mbajtja e një Kuvendi të jashtëzakonshëm për të shqyrtuar drejtimin e partisë nga Lumir Abdixhiku.