Kryetari i BDI-së, Ali Ahmeti, njoftoi se ka zhvilluar një takim me ambasadoren e Mbretërisë së Holandës në Maqedoninë e Veriut, Özlem Canel, ku në fokus të diskutimit ishte procesi i integrimit evropian dhe zhvillimet politike në vend.

Sipas Ahmetit, në takim u theksua se "çdo vonesë e mëtejshme e largon vendin nga perspektiva evropiane, dobëson institucionet dhe krijon pasiguri për të ardhmen". Ai shtoi se ka ngritur shqetësimin për, sipas tij, "goditjet e vazhdueshme ndaj Marrëveshjes së Ohrit dhe arritjeve që garantojnë barazinë, kohezionin ndëretnik dhe stabilitetin e vendit".

Ahmeti theksoi se Marrëveshja e Ohrit mbetet "themel i paqes dhe funksionimit demokratik të shtetit" dhe se çdo cenim i saj, sipas tij, ndikon drejtpërdrejt në stabilitetin e vendit.

Në takim u diskutua gjithashtu për sundimin e ligjit, sigurinë dhe sfidat rajonale. Ahmeti u bëri thirrje partnerëve ndërkombëtarë që, sipas tij, "ta dëgjojnë qartë alarmin tonë", duke theksuar se rruga evropiane dhe Marrëveshja e Ohrit janë dy shtyllat kryesore mbi të cilat mbështetet e ardhmja e vendit.