Gjykata Speciale në Hagë ka përcaktuar afatet e mundshme për përfundimin e deklaratave përmbyllëse në procesin gjyqësor ndaj Hashim Thaçit dhe katër të bashkëakuzuarve të tjerë në rastin që lidhet me akuzat për pengim të administrimit të drejtësisë. Sipas një dokumenti të publikuar në faqen zyrtare të Dhomave të Specializuara të Kosovës, deklaratat përmbyllëse të palëve pritet të mbahen më 10, 11 dhe 14 shtator. Ky afat, megjithatë, varet nga zhvillimi i mëtejshëm i seancave dhe veçanërisht nga dëshmia e Bashkim Smakajt, e cila është planifikuar për datat 17, 18 dhe 19 gusht. Në këtë proces gjyqësor, përveç Hashim Thaçit, akuzohen edhe Bashkim Smakaj, Hajredin Kuçi, Isni Kilaj dhe Fadil Fazliu. Rasti lidhet me akuzat kundër administrimit të drejtësisë, ndërsa gjykata pritet të vlerësojë të gjitha provat dhe deklarimet e paraqitura nga palët para përfundimit të këtij procesi. Vendimi për datat përfundimtare të deklarimeve përmbyllëse do të varet nga ecuria e dëshmisë së Smakajt dhe nga hapat e ardhshëm proceduralë në këtë çështje.