Zhvillimi i komunave mbetet një nga prioritetet kryesore të Qeverisë, e cila përmes dy thirrjeve të para publike ka financuar gjithsej 1.116 projekte kapitale në të gjitha komunat e vendit. Sipas zëdhënëses së Qeverisë, Venera Latifi Azizi, ky është investimi më i madh i realizuar deri më tani në kuadër të zhvillimit lokal. Në një prononcim për TVM2, Latifi Azizi tha se në thirrjen e parë janë financuar 288 projekte, prej të cilave 229 kanë përfunduar, 57 janë në realizim, 9 ndodhen në fazën përfundimtare, ndërsa vetëm 2 ende nuk kanë nisur zbatimin. Ajo shtoi se në thirrjen e dytë janë mbështetur 828 projekte, për 724 prej tyre janë nënshkruar kontratat, ndërsa 361 kanë hyrë në fazën e realizimit. Sipas saj, 296 projekte kanë nisur punimet në terren, 217 janë përfunduar dhe 24 ndodhen në fazën përmbyllëse. Latifi Azizi theksoi se pjesa më e madhe e projekteve përfshin ndërtimin dhe rikonstruksionin e rrugëve, shkollave, çerdheve, sallave sportive, sistemeve të ujësjellësit dhe kanalizimit, si edhe objekteve të tjera publike që ndikojnë drejtpërdrejt në përmirësimin e cilësisë së jetës së qytetarëve. “Ne besojmë se zhvillimi i shtetit fillon nga zhvillimi i komunave dhe se çdo komunë duhet të ketë mundësi të barabarta për të investuar në të ardhmen e saj. Ekipet e Qeverisë tashmë po punojnë për identifikimin e nevojave për një thirrje të re gjatë vitit të ardhshëm, me qëllim që ky cikël investimesh të vazhdojë edhe më fuqishëm”, deklaroi ajo për TVM2. Nga Qeveria u theksua se mbështetja për komunat do të vazhdojë edhe në periudhën e ardhshme, me synimin për të forcuar partneritetin me pushtetin lokal dhe për të krijuar kushte më të mira jetese për qytetarët.