Ali Ahmeti ka pritur në një takim lamtumire ambasadorin e Republikës Çeke në Maqedoninë e Veriut, Jaroslav Ludva, me rastin e përfundimit të mandatit të tij diplomatik. Gjatë takimit, Ahmeti shprehu mirënjohjen për kontributin e ambasadorit në forcimin e marrëdhënieve ndërmjet dy vendeve, si dhe për mbështetjen e vazhdueshme që Çekia i ka dhënë rrugëtimit evropian të Maqedonisë së Veriut. Në bisedë u diskutua për bashkëpunimin e deritanishëm, zhvillimet politike në vend dhe procesin e integrimit në Bashkimin Evropian. Ahmeti vuri theksin te rëndësia e ruajtjes së Marrëveshjes së Ohrit, respektimi i parimit të barazisë dhe përshpejtimi i reformave që lidhen me anëtarësimin në BE. Duke e falënderuar ambasadorin Ludva për angazhimin e tij gjatë mandatit, Ahmeti i uroi suksese në detyrat e ardhshme, duke shprehur bindjen se miqësia dhe bashkëpunimi mes Republikës Çeke dhe Maqedonisë së Veriut do të vazhdojnë të forcohen edhe në të ardhmen.