Gjykata Themelore në Tetovë ka shpallur fajtorë gjashtë persona të akuzuar për mashtrim, pasi u paraqitën rrejshëm si të lënduar në një aksident komunikacioni me synimin për të përfituar kompensim nga kompanitë e sigurimit.
Sipas aktgjykimit, vetëm njëri prej të dënuarve kishte qenë realisht i përfshirë në aksident, ndërsa pesë të tjerët, me udhëzimet e tij, janë paraqitur si pasagjerë të automjetit dhe kanë pretenduar se kishin pësuar lëndime trupore.
Gjykata vlerësoi se të akuzuarit kanë mashtruar zyrtarë policorë dhe mjekun kujdestar në Qendrën Emergjente të Spitalit Klinik të Tetovës, duke paraqitur fakte të rreme për të siguruar raporte mjekësore. Këto dokumente, sipas vendimit, ishin përgatitur për t'u përdorur më pas pranë kompanive të sigurimit, me qëllim përfitimin e kundërligjshëm të dëmshpërblimit për dëme jomateriale.
Me këtë vendim, Gjykata Themelore në Tetovë i ka shpallur fajtorë gjashtë të akuzuarit për veprimet që lidhen me paraqitjen e rreme të lëndimeve dhe tentativën për përfitim material nëpërmjet dokumentacionit mjekësor.