Nënkryetari i BDI-së, Bujar Osmani, ka kërkuar nga autoritetet shqiptare të rishqyrtojnë vendimin për shpalljen “non grata” të analistit Valon Bela dhe imamit Bekir Halimi, të dy shtetas të Maqedonisë së Veriut.
Në reagimin e tij publik, Osmani thekson se Shqipëria është shtet sovran dhe se qytetarët e Maqedonisë së Veriut duhet ta respektojnë sovranitetin e saj, duke shmangur ndërhyrjet në çështjet e brendshme politike.
Megjithatë, ai vlerëson se institucionet shqiptare duhet të marrin në konsideratë edhe lidhjen e veçantë që shqiptarët e Maqedonisë së Veriut kanë me Shqipërinë. Sipas tij, nëse vendimi ndaj dy shtetasve maqedonas ka ardhur si pasojë e një moskuptimi të këtyre rrethanave, atëherë ai mund të rishikohet.
Osmani e përmbyll reagimin me një apel që Shqipëria të mbetet “një derë e hapur për shqiptarët”, ndërsa njëkohësisht kërkon që shqiptarët jashtë kufijve të Shqipërisë të respektojnë shtetin shqiptar dhe institucionet e tij.
Vendimi i autoriteteve shqiptare ndaj Valon Belës dhe Bekir Halimit ka nxitur reagime në hapësirën publike shqiptare, ndërsa qëndrimi i Osmanit vjen si thirrje për rishikimin e masës, duke ruajtur respektin për sovranitetin dhe institucionet e Shqipërisë.