BDI ka ngritur shqetësimin për mungesën e procesverbaleve të mbledhjeve të Qeverisë në gjuhën shqipe në faqen zyrtare të institucionit, duke kërkuar sqarime nga autoritetet përgjegjëse.
Sipas BDI-së, procesverbali i fundit i publikuar në shqip mban datën 19 shtator 2025, ndërsa që nga ajo kohë, sipas partisë, janë zhvilluar 83 mbledhje të Qeverisë, për të cilat procesverbalet nuk janë të qasshme në versionin shqip të faqes zyrtare.
BDI vlerëson se bëhet fjalë për dokumentacion zyrtar dhe kërkon të sqarohet nëse procesverbalet janë përgatitur në gjuhën shqipe, kush është përgjegjës për publikimin e tyre dhe kur do të bëhen të disponueshme për qytetarët.
Partia i është referuar edhe Ligjit për Përdorimin e Gjuhëve, duke kërkuar që institucionet kompetente të vlerësojnë nëse në këtë rast janë respektuar detyrimet ligjore. BDI kërkon gjithashtu publikimin e procesverbaleve që mungojnë dhe shqyrtimin e çështjes nga Inspektorati për Përdorimin e Gjuhëve.
Çështja rikthen në vëmendje debatin politik për zbatimin praktik të gjuhës shqipe në institucionet shtetërore dhe qasjen e qytetarëve në dokumentacionin zyrtar në të dyja gjuhët.