Ish-deputeti dhe kreu i Lëvizjes Arbëria, Bekim Fazliu, ka reaguar ashpër ndaj deklaratave të një ish-ministri nga Maqedonia e Veriut, duke e akuzuar se, në përpjekje për të sulmuar VLEN-in, ka përfshirë në kritikën e tij edhe Kosovën. Fazliu e lidh këtë qasje me qëndrimet e ish-ministrit ndaj nismës “Open Balkan” dhe marrëdhënieve të tij me Serbinë. Ai pretendon se ish-ministri ka zhvilluar 11 vizita në Serbi dhe asnjë në Kosovë, ndërsa përmend edhe pritjen e ministrit të Jashtëm rus, Sergei Lavrov, në Shkup dhe qëndrimin e tij ndaj rastit të Banjskës. “E të del një ish-ministër nga Maqedonia, pionier i ‘Open Balkan’-it, që ka pasur 11 vizita në Serbi e asnjë në Kosovë; që e mirëpret Lavrovin në Shkup; që bëhet ‘asnjëanës’ në rastin terrorist të Banjskës”, shkruan Fazliu. Sipas tij, ish-ministri, pas kalimit në opozitë, po përdor sulmet ndaj VLEN-it për të goditur edhe Kosovën. Fazliu pretendon gjithashtu se ai i referohet Kosovës me terminologji që, sipas tij, lidhet me qasjen serbe, duke përdorur emërtimin “Prishtinë” në vend të “Republika e Kosovës”. “Kjo nuk është thjesht kritikë ndaj VLEN-it. Kjo është një qasje serbe që sulmon Kosovën”, shprehet Fazliu. Në reagimin e tij, ai rikthen në vëmendje edhe debatin për “Open Balkan”, duke e cilësuar këtë nismë si faktor që, sipas tij, ka dobësuar ndikimin euro-amerikan në rajon. “Dobësimi i ndikimit euro-amerikan kishte një emërues të përbashkët katastrofalo-negativ: OPEN BALLKAN”, shkruan ai. Fazliu përmend edhe listat amerikane të sanksioneve si argument për të mbështetur kritikën e tij politike, ndërsa ish-ministrit i kërkon që opozitën ta zhvillojë, siç shprehet ai, “pak më burrërisht”. “Po ua rikujtojmë edhe njëherë! [...] Pak ma burrërisht mbajeni opozitën. Ani, mund të vazhdoni t’jeni argat i ‘Open Ballkan’-it, po me Kosovën kujdes! Është e shqiptarëve, e jona dhe besoj se edhe e jotja!”, përfundon Fazliu. Reagimi i tij vjen në kuadër të përplasjes së vazhdueshme politike mes forcave shqiptare në Maqedoninë e Veriut. Fazliu ka qenë aktiv edhe më herët në kritikat ndaj BDI-së dhe debatet për “Open Balkan”.
