Në ditarin e tij ende të pabotuar, akademiku Rexhep Qosja ka lënë të shkruar reagimet e tij të forta pas arrestimit dhe dërgimit në Hagë të Hashim Thaçit, Kadri Veselit, Rexhep Selimit dhe Jakup Krasniqit në nëntor të vitit 2020. Fragmentet, të datuara më 4 dhe 5 nëntor 2020, janë publikuar në llogarinë e Qoses në Facebook, e cila menaxhohet nga familjarët e tij. Në shënimin e 4 nëntorit, Qosja përshkruan bastisjen në shtëpinë e Jakup Krasniqit në Prishtinë dhe në vendlindjen e tij, ndërsa shënon edhe arrestimin e Krasniqit dhe Rexhep Selimit. “Çfarë vrazhdësie! Çfarë egërsie!”, shkruan ai, duke reaguar edhe ndaj faktit se gjatë bastisjes, sipas shënimit të tij, ishin marrë libra të Krasniqit. “Jam shumë i brengosur. Keqardhje e madhe më ka pushtuar. Po përjetojmë ditë të vështira!”, shkruan Qosja, duke e parë zhvillimin si një paralajmërim për arrestimet që do të pasonin. Të dhënat zyrtare të Dhomave të Specializuara konfirmojnë se Krasniqi u arrestua më 4 nëntor dhe u transferua në Hagë po atë ditë. Një ditë më pas, në faqen e datës 5 nëntor, Qosja shënon arrestimin e Hashim Thaçit dhe Kadri Veselit. “Forcat në uniforma të EULEX-it sot kanë marrë Kryetarin e Kosovës, Hashim Thaçin, dhe kryetarin e Partisë Demokratike të Kosovës (PDK), Kadri Veselin”, shkruan akademiku. Qosja rikthen në ditarin e tij edhe kundërshtimin ndaj krijimit të Dhomave të Specializuara, duke shkruar: “Njëzet vjet pas luftës ne përndiqemi penalisht e ‘juridikisht’ prej Gjykatës së Posaçme që krijuam vetë”. Ai shpreh gjithashtu bindjen e tij se lufta e UÇK-së ishte luftë çlirimtare dhe mbrojtëse. Pas lajmit për dërgimin në Hagë të Thaçit, Veselit dhe Selimit, reagimi i tij bëhet edhe më emocional: “O, o, o sa jam i tronditur! Dje Jakupi, Jakup Krasniqi, e sot këta të tre! Hashimi, Kadriu, Rexhepi!” Në fund të shënimit, Qosja ngre pyetje mbi qëllimin e procesit gjyqësor: “Çka do Evropa? Çka do të arrijë me këto Gjykime të Gjykatës së Posaçme? Ta barazojë luftën tonë mbrojtëse me luftën pushtuese të Serbisë?!” Ditari mbyllet me një thirrje të shkurtër dhe emocionale: “KOSOVË! KOSOVË! ÇKA PRITE!” Arrestimet e katër ish-krerëve u kryen më 4 dhe 5 nëntor 2020, ndërsa ata u transferuan në objektet e paraburgimit të Dhomave të Specializuara në Hagë.