Zvicra nuk ka më nevojë të përdorë rezervat e detyrueshme të benzinës dhe naftës, pasi rafineria e Cressier në kantonin Neuchâtel është rikthyer në funksion pas një ndërprerjeje rreth dyjavore. Megjithatë, situata e furnizimit me produkte të naftës mbetet e tensionuar.

Sipas Zyrës Federale për Furnizimin Ekonomik Kombëtar, rifillimi i prodhimit në rafinerinë e Cressier ka bërë të mundur që nevojat për benzinë dhe naftë të mbulohen sërish përmes kanaleve të zakonshme të furnizimit, përcjell albinfo.ch.

Për shkak të ndërprerjes së punës në rafineri dhe kufizimeve të transportit në lumin Rin, autoritetet kishin lejuar tërheqjen e deri në 30 mijë metra kub benzinë dhe po aq naftë nga rezervat e detyrueshme. Këto sasi përfaqësonin më pak se 3 për qind të rezervave përkatëse të vendit.

Nga sasia e autorizuar, e gjithë sasia e benzinës është tërhequr, ndërsa nga nafta është përdorur rreth dy të tretat. Kompanitë që mbajnë rezervat e detyrueshme duhet t’i rikthejnë sasitë e përdorura brenda gjashtë muajve.

Pavarësisht përmirësimit, autoritetet theksojnë se situata mbetet e tensionuar. Niveli i ulët i ujit në lumin Rin vazhdon të kufizojë ndjeshëm kapacitetet e transportit, duke bërë të nevojshëm përdorimin e mënyrave alternative të transportit.

Autoritetet federale po vazhdojnë ta monitorojnë nga afër situatën, ndërsa aktualisht furnizimi i Zvicrës me produkte të naftës konsiderohet i siguruar.