Të dhënat ekonomike, ashtu si të gjitha të dhënat statistikore, janë të ndryshme. Një e dhënë mund të tregojë një gjë, ndërsa një tjetër diçka krejtësisht tjetër dhe gjithçka varet nga të dhënat që zgjidhni për të krijuar një pasqyrë të ekonomisë, thotë ish-ministri i Financave, Nikolla Popovski.

Sipas tij, duhet të merret parasysh se ka rritje të pagave nominale dhe reale, si dhe rritje të pensioneve nominale dhe reale.

“Kemi një nivel të përshtatshëm inflacioni, i cili nuk është një apo dy, por tre ose katër për qind. E gjithë kjo krijon të ardhura më të mëdha për qytetarët, pjesërisht për shkak të inflacionit dhe pjesërisht reale, dhe kjo i rrit depozitat, por edhe kreditimin. E dhëna për rritjen e PBB-së prej 3–3,5 për qind është inkurajuese”, deklaroi Popovski.

Megjithatë, sipas tij, ka edhe të dhëna shqetësuese.

“Inflacioni ende duhet të vihet nën kontroll. Ai është i rrezikuar nga sjellja, sipas mendimit tim, e politikës fiskale, e cila vazhdon të jetë ekspansioniste dhe prej këtu vjen edhe rritja e PBB-së. Nëse politika monetare nuk vendoset aktualisht në mënyrë më të matur dhe nëse mbështetemi vetëm te politika e Qeverisë, jam i bindur se inflacioni do të rritet shumë, sepse Qeveria po nxit deficite në buxhet dhe në fondet publike”, tha Popovski.

Ai theksoi se deficiti buxhetor ishte 4,3 për qind e PBB-së në vitin 2024, 4 për qind në vitin 2025, ndërsa për gjashtë muajt e parë të këtij viti është rreth 3,1 ose 2 për qind.

“Kjo do të thotë se deri në fund të vitit, sipas projeksioneve, me siguri do të kalojë 4 për qind”, tha Popovski.

Sipas tij, këto janë deficite të larta për Maqedoninë, të cilat nxisin konsumin e qytetarëve dhe kompanive.

“Konsumi i rrit çmimet. Çmimet, kur peshohen sipas asaj që përfshihet në shportën e inflacionit, e përcaktojnë inflacionin. Ai varet edhe nga komponentët e importit. Në këtë moment ne nuk kemi karburante të lëngshme të prodhuara në vend. I importojmë. Kjo krijon deficit edhe në bilancin e pagesave”, tha ish-ministri.

Popovski e cilësoi si shqetësues edhe deficitin e llogarisë korrente gjatë këtij viti.

“Niveli i investimeve të huaja është vetëm 1 për qind e PBB-së në gjashtë muajt e parë, që është jashtëzakonisht i ulët. Bëhet fjalë për rreth 180 milionë. Dhe nëse nga kjo shumë i zbresim investimet e riinvestuara nga kompanitë e huaja që tashmë janë në Maqedoni, atëherë hyrja reale e investimeve të huaja bëhet shumë e vogël”, theksoi Popovski.

Ai shtoi se Qeveritë në Maqedoni, që nga viti 1990 e deri më sot, vazhdimisht kanë bërë deklarata të mëdha për sjelljen e investimeve të huaja, por sipas tij, rezultatet kanë qenë modeste.

“Për investimet e huaja jam gjithmonë i prirur t’i shoh gjërat me shumë kujdes”, tha Popovski.

Si shembull, ai përmendi një kompani greke në pronësi të huaj, e cila para rreth 30 vitesh bleu një fabrikë të madhe në Maqedoni, të trashëguar nga periudha socialiste.

“Para dy ditësh, në bursë, një shoqëri aksionare në pronësi të huaj, një kompani greke në Maqedoni, e cila para rreth tridhjetë vitesh bleu një fabrikë të madhe në vend, njoftoi se kishte 840 milionë denarë fitim në gjashtë muajt e parë. Kjo është rreth 13,5 milionë euro”, tha Popovski.

Sipas tij, kompania më pas mori vendim që të gjithë shumën prej 13,5 milionë eurosh ta shpërndajë si dividendë të parakohshme.

“Në Maqedoni dividentët zakonisht shpërndahen një herë në vit, por ligji mundëson që pas gjashtë muajsh të paguhet paraprakisht dhe në fund të bëhet përllogaritja. Në SHBA, për shembull, dividentët paguhen çdo tremujor. Atje askush nuk pret një vit që të marrë të ardhurat nga aksionet, por ato paguhen çdo tremujor”, shpjegoi Popovski.

Ai tha se në këtë rast rreth 13,5 milionë euro do të transferohen në Greqi.

“Janë rreth gjysmë miliardi denarë që janë marrë më herët jashtë vendit. Edhe kjo është pjesë e investimeve të huaja. Por njëkohësisht, kjo do të thotë se të ardhurat e krijuara këtu largohen dhe transferohen tërësisht në Greqi. Pra, edhe investimet e huaja kanë një anë tjetër të medaljes”, përfundoi ish-ministri i Financave, Nikolla Popovski.