Hatixhe Brika, e njohur në rrjetet sociale si Hati, ka reaguar pasi emri i saj u përmend në disa raportime mediatike lidhur me materiale të pretenduara audio dhe video që thuhet se kanë lidhje me biznesmenin Ergys Agasi.

Sipas këtyre raportimeve, Hati është përmendur në mesin e personave që pretendohet se shfaqen në regjistrime të realizuara në ambientet e zyrës së Agasit.

Megjithatë, në informacionet e publikuara deri më tani nuk janë paraqitur prova që e lidhin Hatixhe Brikën me ndonjë veprimtari të paligjshme.

Pas publikimit të këtyre raportimeve, Hati reagoi përmes një videoje të publikuar në Instagram, duke shprehur indinjatën për mënyrën se si emri dhe fotografia e saj janë përdorur në lajme.

“Unë nuk e kuptoj që nuk ju ec lajmi pa vënë fytyrën time ose emrin tim, se doni me hangër bukë në kurriz tim. Po na keni qarë kokën, na keni lodhur trutë”, u shpreh ajo.

Më tej, Brika kërkoi publikimin e provave mbi pretendimet për të cilat është përmendur emri i saj, duke kundërshtuar publikisht përfshirjen në këto raportime.

“Ku i keni provat? Nxirrni provat. A keni Zot apo s’keni? Nuk ju marr vesh”, tha ajo.

Me reagimin e saj, Hati ka mohuar në thelb insinuatat që mund të krijohen nga përfshirja e emrit të saj në këtë histori dhe ka kërkuar që çdo pretendim ndaj saj të mbështetet me prova konkrete.

Deri më tani, raportimet për regjistrimet e pretenduara dhe personat që mund të shfaqen në to mbeten çështje që kërkojnë verifikim të mëtejshëm, ndërsa përmendja e një personi në materiale të tilla, në vetvete, nuk dëshmon përfshirje në ndonjë veprimtari të paligjshme.