Roli i grave në lidership dhe përgjegjësia për përgatitjen e gjeneratës së re ishin në fokus të diskutimeve në Konferencën V Mbarëkombëtare, Rajonale dhe Ndërkombëtare “Imazhi i Grave dhe Vajzave Shqiptare: Vlerë, Lidership dhe Ndikim drejt Bashkimit Evropian”, e zhvilluar në Vlorë, ku morën pjesë gra të afirmuara nga Shqipëria, Kosova, Maqedonia e Veriut, Mali i Zi, Presheva dhe diaspora.

Në mesin e pjesëmarrëseve ishte edhe drejtoresha e Qendrës Analitike dhe Hulumtuese “Abdilaqim Ademi”, Fatjona Geci, e cila ishte pjesë e panelit “Trashëgimia e lidershipit dhe brezi i ardhshëm: përvoja, mentorimi dhe gjenerata e re e lidereve”.

Në fjalën e saj, Geci theksoi se trashëgimia e lidershipit nuk matet vetëm me pozitat apo arritjet e atyre që kanë udhëhequr, por edhe me dijen, përvojën dhe vlerat që u përcillen brezave të rinj.

Ajo nënvizoi se përgjegjësia e grave që kanë krijuar hapësirë në politikë, institucione, akademi dhe jetën publike është që këtë përvojë ta kthejnë në mundësi për vajzat dhe gratë që vijnë pas tyre.

“Trashëgimia e lidershipit nuk është vetëm ajo që kemi arritur për veten, por ajo që arrijmë t’u lëmë brezave që vijnë pas nesh”, ishte në thelb mesazhi i saj gjatë diskutimit.

Geci e vlerësoi mentorimin si një prej mekanizmave më të rëndësishëm për ndërtimin e një gjenerate të re liderësh, duke argumentuar se të rinjtë nuk duhet të trashëgojnë thjesht poste dhe pozita, por mbi të gjitha vizionin, përgjegjësinë dhe një kulturë të re të lidershipit. Një pjesë e diskutimit iu kushtua edhe raportit të brezave me traditën.

Sipas Gecit, brezi i ri duhet të ketë aftësinë të dallojë cilat vlera dhe tradita duhen ruajtur e përcjellë dhe cilat elemente duhet të lihen pas, në mënyrë që shoqëria të ecë përpara në përputhje me nevojat e kohës. Konferenca vendosi në qendër të vëmendjes fuqizimin e grave dhe vajzave shqiptare, pjesëmarrjen e tyre në vendimmarrje, lidershipin dhe përgatitjen e gjeneratës së ardhshme, duke sjellë në një hapësirë të përbashkët përvoja nga trevat shqiptare dhe diaspora.

Pjesëmarrja e Fatjona Gecit në këtë forum i dha diskutimit edhe një dimension të lidhur me rëndësinë e mentorimit dhe të krijimit të urave mes brezave, me synimin që përvoja e grave të sotme të shërbejë si pikënisje për lidere të reja nesër.