Publikimi i videove intime të disa personazheve të njohur të artit ka shkaktuar një reagim të fortë edhe nga aktori Laert Vasili, i cili foli pa doreza për atë që e konsideron si një nga format më të rënda të dhunës ndaj një njeriu.

Duke folur për rastet e videove që janë shpërndarë në rrjet në “Grida Duma Podcast”, Vasili e zhvendosi diskutimin përtej skandalit mediatik, duke vënë theksin te pasojat që një publikim i tillë mund të ketë mbi jetën dhe familjen e personit që bëhet objekt i ekspozimit, raporton Top Channel.

Në një moment të debatit, ai iu drejtua drejtpërdrejt kompozitorit Adi Hila, duke ngritur një pyetje që sipas tij e ndryshon tërësisht këndvështrimin mbi ngjarjen: “Po t’ia bënin vajzës dhe gruas tënde atë?”

Publikimi i vidoeve intime ka shkaktuar një ortek reagimesh, derisa tashmë dihet se në polici ka dëshmuar vetë kompozitori Adrian Hila.

Hila është proceduar penalisht në gjendje të lirë lidhur me çështjen e videove intime që kanë qarkulluar së fundmi në rrjet.

Sipas A2 CNN, materialet për rastin janë referuar në Prokurori për veprën penale “Ndërhyrja e padrejtë në jetën private”.