Në një kohë kur telefonat dhe pajisjet teknologjike janë bërë pjesë e pandashme e jetës së përditshme, ekspertët e shëndetit paralajmërojnë prindërit për pasojat që koha e tepërt para ekranit mund të ketë tek fëmijët.

Sipas rekomandimeve të Organizatës Botërore të Shëndetësisë (OBSH) dhe Akademisë Amerikane të Pediatrisë (AAP), koha që fëmijët duhet të kalojnë me telefonin duhet të jetë e kufizuar dhe e mbikëqyrur në çdo fazë të moshës.

Fëmijët nën 2 vjeç – nuk rekomandohet aspak përdorimi i telefonit, përveç ndonjë videoje të shkurtër në praninë e prindit.

Nga 2 deri në 5 vjeç – maksimumi 1 orë në ditë, gjithmonë me përmbajtje të përshtatshme dhe nën mbikëqyrje.

 Nga 6 deri në 12 vjeç – 1 deri në 2 orë në ditë, përfshirë përdorimin për detyra shkollore.

Adoleshentët – nuk ka një limit strikt, por prindërit duhet të sigurohen që pajisjet nuk ndikojnë negativisht në gjumë, mësime, shëndet mendor apo jetën sociale.

Ekspertët theksojnë se përdorimi i pakontrolluar i telefonit mund të çojë në varësi, ankth, probleme me përqendrimin, madje edhe izolim social.

“Fëmijët kanë nevojë për lëvizje, komunikim dhe përvojë reale. Telefoni nuk mund të zëvendësojë zhvillimin natyral që ndodh përmes lojës fizike dhe ndërveprimit me të tjerët,” – thuhet në raportin e fundit të AAP.