Bashkimi Demokratik për Integrim (BDI) ka reaguar ashpër ndaj punësimeve të fundit në filialin e Centraleve Elektrike të Maqedonisë së Veriut (CEMV) në Strugë dhe në hidrocentralin “Shpilje” në Dibër, duke i cilësuar ato si shembuj të qartë të diskriminimit etnik dhe përjashtimit të qytetarëve shqiptarë nga tregu i punës në sektorin publik.

Sipas deklaratës së BDI-së, në filialin “Drini i Zi” në Strugë janë angazhuar 23 persona me kontrata të përkohshme, të gjithë nga komuniteti maqedonas, ndërkohë që asnjë shqiptar nuk është përfshirë në këto punësime, pavarësisht përbërjes shumëetnike të rajonit dhe pranisë së madhe të shqiptarëve në këtë zonë.

Situata e ngjashme, theksojnë nga BDI, është përsëritur edhe në hidrocentralin “Shpilje” në Dibër, ku janë bërë tetë punësime të reja, sërish pa përfshirë asnjë qytetar shqiptar.

“Këto zhvillime dëshmojnë për një model të koordinuar dhe të qëllimshëm të diskriminimit institucional dhe përbëjnë një sulm të drejtpërdrejtë ndaj parimeve të përfaqësimit të drejtë dhe barazisë në punësim, të garantuara me ligj dhe me Kushtetutë”, thuhet në reagimin e BDI-së.

Partia ka kritikuar ashpër edhe partnerët shqiptarë në Qeveri, duke i akuzuar për "bashkëpunim të heshtur" me strukturat që po kryejnë, sipas tyre, punësime monoetnike në përfitim të një partie të caktuar.

“Edhe më shqetësuese është heshtja dhe bashkëpunimi i heshtur i mbetjeve të VLEN-it në Qeveri, të cilët shohin punësimet monoetnike të VMRO-së, por nuk arrijnë të sigurojnë as një vend pune për popullin që pretendojnë ta përfaqësojnë”, vijon deklarata.

BDI u bën thirrje drejtuesve të CEMV-së dhe institucioneve përkatëse që të japin shpjegime publike dhe të ndërmarrin masa urgjente për korrigjimin e kësaj që e cilëson si një “padrejtësi të rëndë dhe të papranueshme”.

“Praktikat e punësimit në ndërmarrjet publike nuk guxojnë të kthehen në mjete të favorizimit etnik dhe klientelizmit partiak”, përfundon reagimi i BDI-së./Almakpress