Gjatë Konferencës së 3-të të Mbrojtjes Kibernetike të NATO-s, e mbajtur në Tiranë, kryeministri i Shqipërisë Edi Rama u shpreh se është e rëndësishme të njohësh armikun, pasi foli për sulmin kibernetik që goditi Shqipërinë.
 

Ai gjithashtu nuk i kurseu batutat, duke u shprehur se nuk është as gjeneral, e as ekspert kibernetik dhe gjithashtu është i vetmi në qeverinë e tij pa doktoraturë.

“Kur bëhet fjalë për mbrojtje kibernetike, nuk është ide e mirë të qëndrosh më vete, por është ide e mirë që të bëhesh pjesë për mbështetjen kundra këtyre incidenteve dhe për të formësuar një rrjet të madh mbrojtje. Shqipëria është ndër të parat që është bërë pjesë dhe inkurajoj të gjitha vendet, por ndoshta do të duhet të marrin një mësim që të bashkohen.

Është shumë e rëndësishme ta njohësh armikun dhe të njohësh instrumentet e tij në mënyrë që të mos duhet të përballesh vetë, pra mbledhja e informacionit për instrumentet që përdor armiku është domosdoshmëri dhe këtë se bën dot kur je vetëm, ndërsa së bashku merr masat që ai instrument i ri mos të dëmtojë.

Kuptuam që ndërkohë që partnerët e NATO-s, ndërkohë që na ndihmonin, ata mësonin çfarë ishte e re nga fronti i armikut. Këtu ishin ato që doja të thoja. Unë nuk jam gjeneral, as ekspert kibernetik. Jam i vetmi në qeverinë time pa doktoraturë. Faleminderit”, përfundoi Rama.