Koalicioni VLEN prezantoi programin përpara banorëve të komunës së Haraçinës. Kandidati për numrin një të kësaj komune, Daut Beqiri, u zotua se nëse fiton, gjatë mandatit të tij 4 vjeçar, do t’u jep fund të gjitha temave që për 3 dekada premtohen në çdo cikël zgjedhor, siç është uji i pijshëm, kanalizimi, e deponitë. Ai nënvizoi se këto çështje do të jenë pjesë e së kaluarës, dhe për të to nuk do të ketë kompromis.

“Sa u përket investimeve infrastrukturore uji i pijshëm, kanalizimi dhe rrugët e pa asfaltuara, do të zgjidhen në katër vitet e ardhshme dhe këto janë çështjet me të cilat nuk do të bëjmë kompromis aspak, sepse janë kushte elementare për jetë, të cilat duhej çdo qytetar në çdo vendbanim t’i kishte pasur shumë vite më parë. Shëndetësia është ndër prioritetet kryesore, ambulanca duhet të jetë me kushte moderne, do të punojmë që të sigurojmë mjek specialist dhe sa më shumë shërbime shëndetësore brenda këtij objekti. Haraçinën e kemi amanet nga të parët tanë dhe amanet do ua lëmë pasardhësve tanë”, tha Daut Beqiri, Kandidat i VLEN-it për komunën e Haraçinës.