Koalicioni VLEN ka reaguar sërish ndaj gjendjes në radhët e opozitës shqiptare, duke deklaruar se projekti AKI ka rezultuar “mashtrimi më i madh politik i viteve të fundit”.

Sipas VLEN-it, zhvillimet e fundit në këtë subjekt, përfshirë dorëheqjet e njëpasnjëshme dhe konfliktet e brendshme, tregojnë qartë se “ky projekt nuk u ndërtua për shqiptarët, por për ambicie personale, të maskuara me PR-trukun e ‘referendumit’ për t’u hedhur hi syve qytetarëve”.

“AKI nuk funksionoi asnjë ditë si opozitë serioze. Sot po shpërbëhet në sy të opinionit, gur më gur, figurë pas figure. Ikja e Menduh Thaçit, largimi i Arjanit Hoxhës, Krenar Llogës dhe braktisja e Ziadin Selës janë vetëm simptoma të një strukture të ndërtuar mbi interesat e individëve, jo mbi interesin e qytetarëve”, thuhet në reagimin e VLEN-it.

Megjithatë, nga VLEN theksojnë se “ata nuk gëzohen kur të tjerët shkatërrohen”, duke shtuar se një opozitë e dobët dhe e përçarë dëmton sistemin politik dhe i lë qytetarët pa alternativë reale.

“Shqiptarët meritojnë seriozitet, jo eksperimente të dështuara me shirit ngjitës”, përmbyllet deklarata.