Shqipëria mbështet rrugën evropiane të Maqedonisë së Veriut, jo vetëm sepse të dy vendet janë partnere, por sepse Maqedonia me institucione të forta është siguri për të gjithë rajonin, tha Ministrja e Jashtme dhe e Punëve të Jashtme e Shqipërisë, Elisa Spiropali, e cila ndodhet në vizitën e saj të parë zyrtare në vend.
“Ne nuk e shohim këtë proces si një garë midis vendeve kandidate, por si një rrugë që po ndjekim së bashku, si një
destinacion të pashmangshëm dhe një përkatësi natyrale e popujve tanë. Dhe kjo është arsyeja pse ne e mbështesim fuqimisht rrugën euroatlantike të Maqedonisë së Veriut”, tha Spiropali.
Ajo theksoi se mbështetja e Shqipërisë është edhe për shkak të faktit se në Maqedoni jeton një popull shtetformues shqiptar, i cili, sipas regjistrimit të fundit, arrin në 30 përqind.
Spiropali tha se shqiptarët e Maqedonisë së Veriut janë një faktor progresist, pro-evropian dhe vedimtar për stabilitetin dhe orientimin euroatlantik.
Shqipëria është aktualisht në një fazë të avancuar të negociatave me BE-në, pasi ka hapur të gjashtë kapituj në vetëm 13 muaj, veçanërisht në fushat e sundimit të ligjit dhe luftës kundër korrupsionit.
Mucunski tha se lidhjet kulturore midis dy vendeve janë të forta, si dhe në fushën e mbrojtjes së pakicës kombëtare maqedonase në Shqipëri.
“Unë dhe Elisa jemi takuar shpesh kohët e fundit, në shumë forume të ndryshme, të fokusuara në prioritetet tona të përbashkëta. Jam veçanërisht i kënaqur që në kuadër të mandatit të saj si Ministre e Çështjeve Evropiane dhe Punëve të Jashtme, ajo ka vendosur të bëjë një nga vizitat e saj të para në rajon pikërisht në Shkup”, tha Mucunski.
Në përgjigje të pyetjeve të gazetarëve në lidhje me rrugën evropiane, Mucunski tha se gjetja e një zgjidhjeje për mosmarrëveshjen me Bullgarinë është në interes të shtetit. Ai thotë se midis institucioneve evropiane dhe shteteve anëtare ekziston një vetëdije në rritje për specifikën e rastit të Maqedonisë, i cili nuk mund të krahasohet me asnjë tjetër në historinë e kohëve të fundit të integrimit./Telegrafi
