Pas vendimeve të fundit të Gjykatës lidhur me rastin e tragjedisë së spitalit modular në Tetovë, ku u dënuan me burg disa nga funksionarët e kohës, mes tyre edhe ish-drejtori i Spitalit të Tetovës, Florim Besimi, ka reaguar publikisht kryetari i Komunës së Zhelinës, Blerim Sejdiu, nga radhët e koalicionit VLEN.

Sejdiu është i vetmi zyrtar publik që deri më tani ka dalë me një qëndrim të hapur lidhur me këtë rast, duke e cilësuar procesin gjyqësor si padrejtësi dhe zhvendosje të përgjegjësisë nga ata që kishin pushtetin real për vendimmarrje.

Në reagimin e tij, ai shprehet:

"‘Drejtësia’ për spitalin modular në Tetovë

Sot, në emër të drejtësisë, po dënohen njerëz që nuk vendosën, nuk projektuan, nuk mbikëqyrën dhe nuk kishin pushtetin për të ndaluar tragjedinë e spitalit modular në Tetovë.

Ata nuk hapën tenderë.

Ata nuk përcaktuan standarde ndërtimi.

Ata nuk kishin përgjegjësi për mbikëqyrje.

Dhe megjithatë, sot po mbajnë barrën e fajit.

Ndërkohë, ata që kishin pushtetin real, që firmosën, që vendosën dhe që heshtën, janë ende të lirë.