Njëri nga liderët e koalicionit VLEN, Bilall Kasami, ka garantuar se çështja e mbajtjes së provimit të jurisprudencës edhe në gjuhën shqipe do të zgjidhet në interes të studentëve shqiptarë. Ai bëri të ditur se kjo temë është aktualisht pjesë e bisedimeve brenda qeverisë, si përgjigje ndaj kërkesave të ngritura nga studentët e juridikut.

Kasami theksoi se, pa bujë publike, institucionet po punojnë që të gjendet një zgjidhje konkrete, duke nënvizuar se është e pakuptimtë që i gjithë procesi arsimor zhvillohet në gjuhën shqipe, ndërsa provimet profesionale të mos mund të jepen në të njëjtën gjuhë.

Kërkesa vjen pas peticionit të nënshkruar nga 385 studentë shqiptarë nga fakultetet juridike në Tetovë, Shkup dhe Gostivar, të cilët kërkojnë që provimi i jurisprudencës të jepet në gjuhën shqipe, ashtu siç e parashikon Ligji për Përdorimin e Gjuhëve. Ndërkohë, Ministria e Drejtësisë vazhdon të insistojë se provimi shërben si test për njohjen aktive të gjuhës maqedonase, ndonëse në Ligjin për Provimin e Jurisprudencës nuk ekziston dispozitë që e ndalon zhvillimin e tij në gjuhën shqipe.